Oyggjaleikafótbóltur í Suðuroy

Tá Oyggjaleikafótbóltur verður spældur í Føroyum um hálvtriðja ár, verður í hvussu er onkur dystur í Suðuroy.

Tað er greitt, nú oyggjaleikanevndin hevur kunngjørt, hvar ymsu ítróttakappingarnar verða, tá Oyggjaleikirnir koma til Føroyar í 2027.

Fótbólturin verður eisini avgreiddur í Havn og í meginøkinum annars, men FSF hevur ikki gjørt av, hvørjir vøllir skulu brúkast.

Mest í meginøkinum

Yvirhøvur verður kappast nógv í Havn, Klaksvík, Runavík og Vágum.

Badminton, borðtennis, frælsur ítróttur, judo, kurvabóltur, skjóting, súkkling, svimjing og tennis verður í Havn og nær við Havnina.

Kappast verður í bogaskjóting í Miðvági, í fimleiki í Runavík og í flogbólti og triatlon í Klaksvík.

 - Hetta hevur verið drúgt, og tað bar tíverri ikki til at ganga øllum á møti. Við hesi staðsetingini meta vit tó, at flestu ítróttagreinarnar hava fingið bestu møguleikar og hentleikar at avgreiða sínar kappingar á Betri Oyggjaleikum, sigur Oyggjaleikanevndin.

Oyggjaleikir verða í Føroyum í døgunum 3.-9. juli 2027, og kappast verður í 14 ítróttagreinum.