Horvni mykinesmaðurin

Jóladag klokkan 13 verður forvitnislig ljóðmynd í útvarpinum. 

Magni Arge hevur sett sær at fyri at finna út av, hvat bleiv av mykinesmanninum Jóan Frederik Joensen. 

Tað vísir seg, at tá farið varð undir útskifting av jørð í Mykinesi í sekstiárunum, hekk ein gyllin av jørð í leysari luft, tí mykinesmenn vistu ikki um eigarin Jóan Frederik Joensen var livandi ella deyður. 

Fór til Kanada

Jóan Frederik Joensen fór til Kanada í 1912, og hevði javnan samband við familjuna heima í Føroyum fyrstu árini.

Men sambandið slitnaði um 1920, og hóast bæði familja og sorinskrivari leitaðu uppi og nirði í Kanada at bera honum deyðsboð av pápanum og mammuni og arv í tí sambandi, so funnu tey hann ikki.   

Tey funnu hann heldur ikki í 1966, men gyllinin hann arvaði, var aftur tinglýstur sum ogn hjá Jóan Fredrik Joensen - búsitandi í Kanada - hóast ongin hevði hoyrt frá honum í 46 ár.

Hvør var horvni mykismaðurin?

Men hvør var Jóan Frederik Joensen, hví fór hann til Kanada, hvør var hansara lagna, og hvønn arv legði hann eftir seg?

Tað hoyra vit um í sendingini ”Horvni mykinesmaðurin” jóladag klokkan 13, sum byggir á brøv hann skrivaði heim til familjuna, føroysk og amerikonsk skjøl og aðrar føroyskar og amerikanskar keldur.

Myndina av Jóan Fredrik Joensen tók mostur hansara Elsa Petersen, sum var fødd Debes. Hon var av Mortanstovufólkinum í Havn og hevði lært til fotograf.

Nøkur brøv eru varðveitt, sum Jóan Frederik Joensen skrivaði heim úr Kanada, við vakrari hondskrift. Eitt nú lat hann væl at lívinum sum skóghøggari, hóast tað var hart arbeiði. 

Horvni mykinesmaðurin

Tilvildarlig samtíðarmynd av skóghøggarum

Hvat: Horvni mykinesmaðurin
Hvar: Í útvarpinum og á KVF Ljóð
Nær: Jóladag kl. 13, og tá tað passar tær á KVF Ljóð
Lýsing: "Horvni mykinesmaðurin" er ein dokumentarisk ljóðmynd um Jóan Frederik Joensen úr Mykinesi, sum fór til Kanada í 1912 og hvarv í 1920, tá alt samband við hann slitnaði. Hvør var hann, og hvussu var ein gyllin í jørð við til at loysa gátuna um hansara lagnu? Magni Arge leggur sendingina rættis, sum byggir á grein hjá Zacharias Wang og ymsar aðrar keldur úr Føroyum og Amerika. Magni lesur sjálvur saman við Páll Danielsen og Høgna Joensen. Rúni Eysturlíð stóð fyri upptøkuni, meðan Bárður Háberg reinsaði gamalt ljóðbrot.