Systrar hava hekklað veðurteppi

Tvey teppi, 365 dagar og hvør einasti litur er avgjørdur av veðrinum. Hitastigini hava nevniliga stýrt hekklinál og tráði. 

Úrslitið er eitt sokallað veðurteppi.

- Vit høvdu sæð eitt uppslag á Facebook, har ein kvinna hevði lagt mynd út av sínum veðurteppi, og vit hildu, at tað hevði verið stuttligt hjá okkum at roynt, sigur Magna Lamhauge Joensen, sum saman við systrini, Árnu Lamhauge Joensen, hekklaði hvønn dag í 2025.

Tað var ikki av tilvild, at tær byrjaðu 1. januar 2025.

- Magna fekk staðfest krabbamein um várið 2024, og í desember vóru boðini, at krabbin hevði spreitt seg, og hon skuldi hava viðgerðir í fleiri umførum í Danmark. Tá blivu vit samdar um, at nú skuldi tað vera, at vit fóru at hekkla hvørt okkara veðurteppi, fortelur Árna Lamhauge Joensen.

Hóast hugurin ikki hevur verið líka stórur hvønn dag í árinum at hekkla, so eru systrarnar báðar sera fegnar um teppini, sum tær standa við í dag.

- Hetta hevur verið eitt stuttligt og áhugavert prosjekt, og nú halda vit, at teppini eru faktisk nokk so fitt og pen, sigur Árna Lamhauge Joensen.

Í morgunsendingini fortelja systrarnar um hugskotið at hekkla veðurteppi, og hvat tað hevur givið teimum at sitið við hekklinál og tráði so at siga hvønn dag í eitt heilt ár.