Á mótaviku sum føroyskur ávirkari

Flottar mótasýningar, nýggjasti mótin, nógv fólk og veitslur.

Copenhagen Fashion Week, sum er kenda mótavikan í danska høvuðsstaðnum, virkar ivaleyst fyri flestu okkara sum rættiliga glæsilig og luksuskend - tí soleiðis verður henda vikan ofta lýst á netinum, í bløðunum og ikki minst á sosialum miðlum.

Men hvussu er henda vikan veruliga, um tú ikki ert eitt stórt brand og bara fert einsamøll á Copenhagen Fashion Week, sum føroyskur ávirkari á Instagram?

Á ársins mótaviku í Keypmannahavn í januar var Ásla Breyt Danielsen til staðar. Umframt at vera frisørur, er Ásla eisini rættiliga virkin á Instagram sum ávirkari. Eitt nú leggur hon nógv út um móta og ikki minst mótan í Føroyum.

- Nú hevði eg møguleikan at fara, og eg vildi vita, um tað bar til hjá mær sum lítil ávirkari úr Føroyum at sleppa til ymisk events og ikki minst fáa áhugaverd samstørv í lag, sigur Ásla Breyt Danielsen.

Onkrar samstarvsavtalur spurdust burtur úr túrinum til Danmarkar, men fyrst og fremst fekk Ásla betri innlit í, hvussu ávirkarar gera fyri at skapa áhugavert og spennandi innihald til sínar sosialu miðlar.

Í morgunsendingini greiðir Ásla Breyt Danielsen frá upplivingini á Copenhagen Fashion Week.