Framleiðslukostnaðurin í alivinnuni lækkar

Miðal framleiðslukostnaðurin í alivinnuni er 44,77 krónur fyri kilo í ár.

Tað hevur Uttanríkis- og vinnumálaráðið kunngjørt.

Framleiðslukostnaður er rávørur og hjálpartilfar, goymslubroytingar, aðrir uttanhýsis kostnaðir og starvsfólkakostnaður.

Nýggjur leistur

Fra 1. januar í 2025 skal framleiðslukostnaðurin roknast eftir einum nýggjum leisti. Eitt nú var søla og flutningur partur av framleiðslukostnaðinum, til 1. januar 2025. 

Hetta var broytt í nýggju lógini um tøkugjald við lægri tøkgugjaldsstiga og einum serskatti á alivinnuna.

Frá 1. oktober til 31. desember í fjør var miðal framleiðslukostnaðurin 51 krónur og 71 oyru.

Hann var 52 krónur og 37 oyru frá 1. apríl til 1. oktober.

Ásetir tøkugjaldið

Framleiðslukostnaðurin verður brúktur til at áseta tøkugjaldið hjá alivinnuni 

Framleiðslukostnaðurin skal takast av miðal altjóða laksaprísinum, áðrenn tøkugjaldið verður sett.