Tríggjar atkvøður í Oyndarfirði verða kannaðar í Danmark

Tríggjar atkvøður frá kommunuvalinum í Oyndarfirði 12. november í fjør verða nú kannaðar í Danmark.

Politiið í Norðurøkinum sendi tær niður fyri jól og fekk váttan um móttøku 3. januar.

Poliitið í Føroyum hevur ikki tann førleika, sum skal til fyri at staðfesta, um ein atkvøða er broytt.

Men tað hevur ein deild hjá Ríkispolitinum. 

Fáa svar í hesum mánaðinum

Jan Poulsen, økisleiðari í Norðurøkinum, væntar at fáa svar úr Danmark nú í januar.  

Ein atkvøða hjá Jonhardi Danielsen í Oyndarfirði var gjørd ógildug í fínteljingini eftir valið.

Tá atkvøðurnar í Oyndarfirði vóru taldar valkvøldið, hevði Jonhard Danielsen 102 atkvøður, millum annað tríggjar úr Oyndarfirði.

Jóhan Vest hevði 101 atkvøðu.

Misti í fínteljingini

Men í fínteljingini misti Jonhard Danielsen eina atkvøðu, hann fekk í Oyndarfirði.

Nú stóð á jøvnum millum hann og Jóhan Vest.

Lutakast var, og tað lutakastið vann Jóhan Vest.