Grøna orkuframleiðslan setti met fjórða árið á rað

Grøna elorkuframleiðslan hjá SEV í 2024 setti met fjórða árið á rað.

Tað boðar SEV frá á síni heimasíðu.

Grøna elorkuframleiðslan vaks 18 prosent.

Samlaða elframleiðslan fyri alt landið í 2024 var 480 GWt, og býtið var smá 57 prosent varandi orka og góð 43 prosent olja.

100 prosent í átta samdøgur

Í 2024 var elframleiðslan um alt landið 100 prosent grøn í tilsamans átta samdøgur. Í Suðuroy var elframleiðslan 100 prosent grøn í góð 110 samdøgur.

Tað er serliga vindorkan, sum hevur hilnast væl, og sum eisini setti met fjórða árið á rað. Síðan 2021 er vindorkan nærum trífaldað, skrivar SEV.

Væl kom eisini burtur úr vatnorkuni í 2024, millum annað takkað verið óvanliga vátum veðri, millum annað í august og desember.

Elframleiðslan úr olju minkaði góð átta prosent.