Flogvanlukka í USA: Líkini av 30 fólkum eru funnin

Higartil eru líkini av 30 fólkum tikin upp úr Potomac-ánni í Washington DC, eftir at eitt ferðafólkaflogfar og ein hernaðartyrla stoyttu saman í nátt. 

Tað skrivar m.a. the Guardian, sum endurgevur dulnevndar keldur.

Flogfarið skuldi seta seg á Ronald Reagan-flogvøllinum, tá vanlukkan hendi. Flogfarið og tyrlan duttu síðani niður í Potomac-ánna, har bjargingarlið síðani hava roynt at sleppa til fólkini, sum vóru við, men vánalig líkindi hava darvað arbeiðnum.

64 fólk vóru við flogfarinum og trý við tyrluni. 

Vanlukkan verður kannað

Nýggi verjumálaráðharrin í USA, Pete Hegseth, skrivaði á sosialum miðlum í morgun, at ein kanning var sett í verk alt fyri eitt, bæði av herinum og verjumálaráðnum. 

Sambært BBC verður serliga hugt at floghæddini hjá tyrluni, og hví hon var har í økinum, tá vanlukkan hendi.

Økið, har vanlukkan hendi, er undir sera strongum eftirliti. Tað er bert fáar kilometrar frá bæði Hvítu húsunum og kongressini, og nógv flogferðsla er í økinum.

Enn er ongin fráboðan um, at fólk komu frá vanlukkuni við lívinum.