Nýggjar sjálvtøkur í Klaksvík, Runavík og Vágum

Nýggjar sjálvtøkur til handkeypsheilivág verða settar upp uttanfyri apotekini í Klaksvík, Runavík og Vágum.

Heilsumálaráðið skrivar, at hetta fer at geva fólki betri atgongd til handkeypsheilivág alt samdøgrið.

Fyrsta sjálvtøkan í landinum var tikin í nýtslu í fjør, hon stendur uttanfyri Tjaldurs apotek í SMS í Havn.

Sjálvtøkurnar eru knýttar at Skjáttuni hjá Talgildu Føroyum, og bara fólk sum eru 18 ár ell eldri, kunnu keypa í sjálvtøkunum.

Ætlanin er, at fleiri sjálvtøkur skulu setast upp um landið.