Sámal & Benjamin í løtuni: – Hetta er jú eitt vandamikið samstarv 

Í Klaksvík er javnur stremur av fólki, sum leitar sær oman á festivaløkið. Ársins Summarfestivalur byrjar í kvøld, og Kringvarp Føroya er við til allan festivalin. Vit leggja út myndir, samrøður og innsløg beinleiðis av festivalinum. Eisini framleiða vit nýggj innsløg í røðini "Í løtuni", har tónleikaframførslur verða tiknar upp úti í føroysku náttúruni. 

Fyrstu gestirnir "í løtuni" á Summarfestivalinum eru Sámal & Benjamin, sum í kvøld fara á pall í Tjaldinum. 

Sámal Ravnsfjall og Benjamin Petersen eru báðir kend nøvn á føroyska tónleikapallinum. Í mong ár hava teir framført bæði sum solistar og saman við ymiskum bólkum. Nú hava teir tikið stigið til at spæla saman. 

Sámal & Benjamin í løtuni

 
(Mynd: Kristina Sundstein) Sámal & Benjamin spæla í Tjaldinum í kvøld kl. 20.

Eitt vandamikið samstarv 

Til framførsluna í løtuni hava teir valt at spæla sangin "Tíðin", sum Annika Hoydal gav út á plátuni Dulcinea. Teir halda, at lagið hevur verið ov lítið spælt, og vilja tí geva tí nýtt lív.  

Tá teir vóru spurdir, hvussu samstarvið kom í lag, var svarið einfalt. 

– Hetta er jú eitt vandamikið samstarv. Sámal misti sín makkara, Jóan Jakku Guttesen. Eg hevði jú ein makkara, Petur Poulsen. Hann er so enn á lívi, men fekk eina heilabløðing. So vit spæla eitt sindur við eld, sigur Benjamin Petersen.  

Við einum brosi leggja leggur Sámal afturat: 

– Vit vita ikki, hvør verður tann næsti. 

Teir nevna eisini, at báðir ganga við leðuvesti og dáma sera væl blues. Tí lá beint fyri at royna eitt samstarv. 

Samspælið teirra millum ber boð um, at teir hava spælt nógv saman, men framførslan í Tjaldinum í kvøld verður tann størsta higartil. 

Á skránni verður ein fjølbroytt konsert við bæði kendum og minni kendum sangum. Umframt "Tíðina" hjá Anniku Hoydal lova teir eisini fleiri aðrar klassikarar. 

Hoyr Sámal & Benjamin í løtuni omanfyri.