Eingin góð viðgerð at fyribyrgja spontanar abortir

Sjúkrahúsverkið sigur, at eingin góð viðgerð er at bjóða kvinnum fyri at fyribyrgja spontanar abortir. 

Sjúkrahúsverkið bjóðar kvinnum, sum hava havt spontanar abortir, eyka trygdarskanningar, tá viðgongutíðin byrjar.

Eisini verður gjørd ein gynækologisk kanning, har til ber at staðfesta møguligar vøddaknútar ella avlagan á lívmóðurini. 

Liljan Weihe, Uttanlandsnevnd

Liljan Weihe, løgtingskvinna. (Mynd: Bjarni Árting Rubeksen)

Í Føroyum brúka vit somu mannagongdir sum í grannalondunum.

Granskað verður, hvussu heilsuverkið kann fyribyrgja spontanum abortum.

Kemur nýggj læknafrøðilig vitan um fyribyrgjandi viðgerð, sum hevur við sær broytingar í mannagongdunum í grannalondunum, verða mannagongdirnar eisini broyttar í Føroyum.

Tað sigur Súsanna Bertholdsen, landsstýriskvinna, í svari til Liljuna Weihe, løgtingskvinnu.

Landsstýriskvinna sigur, at tá kvinna, sum er við  barn, fer at bløða, ella fær pínu, skal hon fara til kommunulæknan, sum gevur ávísing til Gynækologisk ambulatorium. 

Súsanna Bertholdsen, 16:9

Súsanna Bertholdsen, landsstýriskvinna í heilsumálum. (Mynd: Bjarni Árting Rubeksen)

Tríggir møguleikar

Um staðfest verður har, at fostrið er deytt, eru tríggir møguleikar.

Bíðað verður við viðgerð fyri at vita, um fostur og móðurkaka fara av sær sjálvum.

Ella verður heilivágur givin fyri at framskunda prosessina.

Ella ein útskaving verður gjørd.

20 prosent av kvinnunum, sum eru við barn, fáa spontanum abort.

Helvtin veit ikki, at tær eru við barn.