Kirsty Coventry úr Simbabve er fyrsti kvinnuligi forseti í IOC

Fyri fyrstu ferð í søguni hjá altjóða olympisku samgonguni, hevur felagsskapurin fingið ein forseta, sum er kvinna.

Tað hendi seinnapartin, tá Kirsty Coventry úr Simbabvi, vann forsetavalið og gjørdist 10. forsetin hjá IOC. Hon avloysir Thomas Bach úr Týsklandi, sum hevur verið forseti síðan 2013. 

Nýggi forsetin í IOC, sum skal sita í átta ár, takkaði fyri heiðurin og sambært heimasíðuni hjá felagsskapinum gleðir hon seg til at sleppa í gongd.

- Sum níggju ára gomul genta ímyndaði eg mær ongantíð, at eg fór at gerast forseti í IOC. Eg fari at gera alt fyri at tryggja, at vit fara at brúka hesi evnini til fulnar. Tað er ikki bara ein stórur heiður, men eisini áminning um skylduna hjá mær, at eg við reystleika og við virðisgrundarlagnum hjá okkum skal standa á odda fyri arbeiðnum í IOC, segði Kirsty Coventry millum annað.

Kirsty Coventry vann á Feisal Al Hussein úr Jordan, Johan Eliasch úr Svøríki, David Lappartient úr Fraklandi, Morinari Watanabe úr Japan, og Juan Antonio Samaranch Salisachs úr Spania, og tað gjørdi hon longu í fyrsta umfari. 

Undan valinum var væntað, at Sebastian Coe fór at vinna.

Hoyr alt innslagið, sum varð sent í tíðindunum í kvøld: