Gjørdu nýggjan sáttmála, áðrenn tann galdandi fer úr gildi

Fakfelagið Samverk og Føroya arbeiðsgevarafelag hava gjørt nakað so sjáldsamt sum nýggjan sáttmála, áðrenn tann galdandi fer úr gildi.

Tey hava gjørt sáttmála, sum er galdandi frá 1. mai í ár til 1. mai í 2027.

Nú 1. mai hækkar lønin 4,32 prosent.

1. mai næsta ár hækkar hon 3,87 prosent.

1. januar næsta ár kemur nýggj áseting um, at døgurðasteðgurin ikki verður drigin frá arbeiðstíðini. 

Døgurðasteðgur

Fólk, sum arbeiða meira enn fimm tímar um dagin, hava rætt til døgurðasteðg, sum er minst 20 minuttir.

Hann verður næsta ár løntur døgurðasteðgur.

Broytingar eru eisini í lønartalvunum.Trý lønarstig detta burtur, so skjótari verður at røkka endastignum.

Samverk var fyrr S&K felagið.

Tað er felag hjá krambafólkum, sølufólkum, skrivstovufólkum, tekniskum starvsfólkum, øðrum fakbólkum og lærlingum.

Góð 70 prosent av limunum í Samverki eru kvinnur.