Ónøgd við Tórsfest: – Tit sorla handilslívið

Ónøgd valdar ímillum handilsfólk og onnur, sum hava sítt virksemi í miðbýnum í Havn, tí hann so leingi er stongdur og avbyrgdur orsakað av Tórsfest, sum verður í kvøld.

FK í Miðbýnum er ein handil, har tey eru ónøgd við ógvusliga skerdu atgongdina til handilin.
Í einum opnum brævi á Facebook-vanganum, vendir FK í Miðbýnum sær til býráðið í Tórshavnar kommunu við hesi áheitan:

"Kunnu tit ikki fáa opnaðar vegirnar í Miðbýnum í morgin ári tíðliga og ikki kl. 13.
Tit "sorla" sundir alt handilslív her í Miðbýnum við, at steingja allar vegir fleiri dagar frammanundan.
Aðrar staðir, brúka tey nakrar tímar at stilla slíkar pallar upp og takað niður.
Næsta ár, flyti alt hetta út á Skálatrøð. Nógv betur umstøður fyri øll.
Annars góða ólavsøku"

Vit hava roynt at fingið orð á Elsu Berg, borgarstjóra í Havn, men hon hevði ikki stundir at tosa við okkum í dag. 

Tórsfest er eitt privat, kommersielt tiltak, og vit ætlaðu at spyrja borgarstjóran, hvørjar treytir eru fyri slíkum tiltøkum, og hvussu stór inntriv, tey sleppa at gera í lív og virksemi í býnum annars.