SÍ-venjarin fær langt leikbann

Spælandi venjarin hjá SÍ, Mateusz Pazgan, fær leikbann í 5 dystir, og sleppur ikki at vera venjari ella at hava nakran leiklut undir nøkrum dysti í ein mánað.

Tað gjørdi Flogbóltssambandið av mikudagin.

Orsøkin er, at SÍ-venjarin hevur lagt niðrandi og happandi uppslag á Tik Tok vanga sín um dómararnar í triðju FM-finaluni hjá monnum.

Hann hevur okkurt um 25.000 fylgjarar á Tik Tok.

SÍ tapti fyri Mjølni í triðju og avgerandi FM-finaluni hjá monnum á Giljanesi 27. mars.

Starvsnevndin í Flogbóltsambandinum sigur, at slík happing - herundir á sosialu miðlunum - undir ongum umstøðum kann góðtakast, og at tað hevur vigað tungt í avgerðini, at talan er um ein venjara.

Mateusz Pazgan hevur seinni biðið um umbering og hevur strikað uppslagið á Tik Tok og eitt annað líknandi uppslag, skrivar Flogbóltssambandið.