AfD hevur stevnt týsku trygdartænastuni

Alternative für Deutschland, flokkurin ytst á høgravongi, hevur stevnt týsku trygdartænastuni. 

Týska trygdartænastan, BfV, lýsti í farnu viku flokkin at vera víðgongdan. 

Ein dómstólur í Køln hevur tikið ímóti stevningini frá AfD, sigur eitt talsfólk flokkin.

Seinasta fríggjadag kom fram, at trygdartænastan bólkaði flokkin sum víðgongdan flokk, og gav við tí heimild til at hava størri eftirlit við AfD enn áður, eitt nú við at fáa keldur í flokkinum og avlurta samskifti millum limir. 

Partar av flokkinum, millum annað landspartafeløg og allur ungdómsflokkurin, eru longu flokkað sum víðgongdir.

Sambært týsku trygdartænastuni er AfD ein flokkur, 'sum er í stríð við grundleggjandi meginreglur í grundlógini, eitt nú menniskjavirði, rættarsamfelag og fólkaræðisligar meginreglur.'

AfD hevur støðugt avsannað skuldsetingarnar.