Pávin heitir á Ísrael um at loyva neyðhjálp inn í Gasa

Leo pávi 14. heitir á Ísrael um at lata neyðhjálp sleppa inn í Gasageiran.

- Støðan í Gasageiranum er ørkymlandi og pínufull. Eg endurtaki áheitan mína um, at rættvís humaniter hjálp skal sleppa inn, og at fíggindaskapurin skal enda, hvørs hjartanemandi prís, børn, gomul og sjúk skulu rinda fyri, segði pávin í vikuligu talu síni á Pæturstorginum í dag.

Síðani kríggið brast á, hevur Ísrael sett strangar avmarkingar fyri, hvat sleppur inn í Gasageiran. Og 2. mars setti Ísrael forboð fyri at flyta neyðhjálp yvirhøvur inn í Gasa.

2,1 millión palestinar búgva í Gasa, og støðan hjá teimum er hættislig, sambært ST og hjálparfelagsskapum.

Í hesi vikuni hevur Ísrael tó loyvt nøkrum fáum lastbilum við neyðhjálp inn í Gasa, men hetta nøktar ikki nær námind tørvin, sum gasabúgvar hava.