Løgmaður: Tekin um at vit fáa sjálvstøðugan føroyskan limaskap

Aksel V. Johannesen, løgmaður, heldur, at tað er eitt gott tekin, at Føroyar, Grønland og Áland voru boðin við á fundin hjá norðurlendsku stjórnarleiðarunum í Finnlandi í dag, eisini fyri føroyska kravið um at fáa sjálvstøðugan limaskap í Norðurlandaráðnum.

Aksel V. Johannesen sigur, at tað er sjáldan, at hann er boðin við til slíkar fundir, og hetta er fyrstu ferð, at hann er við á norðurlendskum stjórnarleiðarafundi í Finnlandi. 

Á fundi í Norðurlandaráðnum í Reykjavík í fjør gjørdi løgmaður greitt, at annaðhvørt eru Føroyar við á jøvnum føti ella ikki.

- At Føroyar eru við á fundinum í dag, er tekin um, at norðurlendsku stjórnirnar, sum hava verið atfinngarsamar móti sjálvstøðugum føroyskum limaskapi, hava tikið føroysku støðuna til eftirtektar, sigur løgmaður.

- Tí vænti eg eisini, at arbeiðið at broyta Helsingfors-sáttmálan fer at bera mál, og at Føroyar um ikki alt ov langa tíð fáa fullan limaskap í Norðurlandaráðnum, sigur Aksel V. Johannesen.

Føroyar hava fiskiveiðisáttmála við Russland, men tann spurningurin var ikki viðgjørdur á fundinum í dag, sigur løgmaður.

Hoyr samrøðu, sum Frants Jensen gjørdi við Aksel V. Johannesen í útvarpstíðindunum: