Fiskamarknaðurin: Fiskiskapurin er brúkiligur

Streymurin er harður alla vikuna, men veðrið verður gott tað mesta av vikuni, so Fiskamarknaðurin væntar nakað av útróðri, nú fiskaríið er brúkiligt. Tað skrivar Fiskamarknaðurin á heimasíðu síni.

Ísfiskalínuskipið, sum fiskar tosk og hýsu norðanfyri, kemur væntandi at avreiða síðst í vikuni.

Seks frystilínuskip eru við Føroyar, tvey eru á Flemish Kap og eitt er á Grand Bank. Tey fiska tosk og kalva.

Tríggir djúpvatnstrolarar, sum fiska tosk, eru á Íslandsrygginum, og tveir teirra avreiða væntandi í vikuni.

Ein djúpvatnstrolari er í bretskum sjógvi og fiskar svartkalva. 

Tveir frystitrolarir fiska svartkalva við Føroyar.

Um partrolarar sigur Fiskamarknaðurin, at fýra pør eru úti og fiskaríið hjá teimum er brúkiligt. Tvey pør fiska gulllaks.

Ein trolbátar er á landleiðini og fiskar flatfisk og tosk. Tveir eru norðanfyri og fiska tosk og hýsu og nakað av flatfiski. Teir avreiða væntandi allir í vikuni. 

Trý garnaskip fiska svartkalva og eisini hjá teimum er fiskiskapurin brúkiligur. Væntandi avreiða øll í vikuni. 

Eitt garnaskip fiskar havtasku, skrivar Fiskamarknaðurin.