U21: Føroyar vunnu á Fraklandi

Tað restaðu minuttir, tá Ísak Vedelsbøll akkurát kláraði at kroysta bóltin aftur um franska málverjan eftir eina fríspæling frá Óla Mittún. Føroyar fingu eitt 3m-kast mitt fyri og bólturin varð spældur til Óla Mittún, sum valdi at spæla til Ísak Vedelsbøll, hóast hesin stóð mitt í einum trunka við fronskum verjuspælarum.

Strikuspælarin, sum spælir í bestu svensku kappingini, klóraði bóltin til sín og kláraði upp á ein ella annan máta at fáa bóltin í franska málið, men tað er synd at siga, at franski málverjin var serliga væl nøgdur við avgerðina hjá dómaranum, sum vóru úr Bosnia Herzegovina.

Treiskaðust fleiri ferðir

Føroyar vóru aftanfyri við trimum, tá tað restaðu ellivu minuttir, men við einum máli frá Høgna Heinasyni og tveimum frá Óla Mittún komu Føroyar upp á javnt, men tað var bara fyri at síggja franskmenn fara framum aftur tá tað restaðu fýra minuttir.

Næstu løtuna skoraði fyrst Sofus í Selvindi Nattestad og síðan var tað Ísak Vedelsbøl, sum endaði skoringina og syrgdi fyri, at Føroyar vunnu við einum máli móti Fraklandi. Endaliga støðan gjørdist 28-27 til Føroyar.

Fjórðingsfinalan tryggjað

Tað leikaði øgiliga hart á hjá føroyingum í dag, sum fleiri ferðir vóru aftanfyri við trimum og eisini fýra málum. Men enn einaferð megnaði U21-landsliðið hjá monnum at vísa, hvør dugur er í teimum.

Tað hevur við sær, at Føroyar nú hava fýra stig í bólki III, har Danmark eisini hevur fýra stig. Frakland og Rumenia hava enn einki stig, og tá bara ein dystur er eftir merkir úrslitið í dag, at Føroyar longu nú hava spælt seg víðari til fjórðingsfinalurnar.

Tað er tó ein dystur eftir í høvuðsumfarinum, hann er móti Danmark og verður hann spældur í morgin. Danmark vann í dag við sjey málum móti Rumenia, sum Føroyar eisini vunnu á við sjey málum.

Eftir dystin var Óli Mittúr kosin dagsins leikari.

Føroysku hagtølini frá dystinum:

Málskjúttar hjá Føroyum vóru: Óli Mittún 9 (4), Ísak Vedelsbøl 4 (1), Niklas Gaard 4, Høgni Heinason 3, Rókur Ziskason 3, Sofus í Selvindi Nattestad 1, Tóki Fríðriksson 1, Trúgvi Hálvarsson 1, Búi Poulsen 1 og Høgni Højsted 1.

Í málinum hevði Aleksandar Lacok tíggju bjargingar av 33 skotum.

Føroyingar fingu tvær útvísingar í dystinum og franskmenn tríggjar. Men franskmenn fingu eisini eitt reytt kort, til liðskiparan, sum mátti av vølli seint í fyrra hálvleiki.