Friðargonga í Havn í kvøld

Í kvøld klokkan seks verður aftur friðargonga í Havn í sambandi við kríggini í Ukraina og Miðeystri.

Byrjað verður á Vaglinum, uttan fyri tinghúsið, haðani gingið verður út í Tinganes, og um Amtmansborgina, niðan aftur á Vaglið.

Jógvan Fríðriksson, biskupur, og Zaid Al-Jay, sum er ættaður úr Irak, siga nøkur orð, og Elin Brimheim Heinesen syngur.

Tað er áhugafelagsskapurin "Føroyingar fyri friði", sum skipar fyri friðargonguni.

henrik weihe joensen

Henrik Weihe Joensen.

Vápnahvíld og friðartilgongd

Um friðargonguna verður sagt, at hon enn sum áður hevur til endamáls, at seta vápnahvíld og friðartilgongdir á breddan heldur enn kríggj og vápnadubbing.

- Í friðargonguni vilja vit í felag og í friði vísa samkenslu við teimum líðandi í Ukraina, Palestina, Ísrael og øðrum londum, har yvirgangur og kríggj herja. Samtíðis vilja vit í friðargonguni gera løgting, landsstýri og donsku stjórnina varug við týdningin, at tey meira virksamt enn higartil stuðla vápnahvíld og friðartilgongdum í krígsraktu londunum.

- Í hesum sambandi vil friðargongan eisini vísa politisku stjórnunum í Føroyum og Danmark á, at halda aftur við at stuðla eini øktari vápnadubbing, skrivar felagsskapurin.

Henrik Weihe Joensen, fyriskipari, var í Summarmorgni í morgun: