Stungu myndatól í lundaholur

Tað kemur meira enn so fyri, at fólk ganga og sita lundalandinum í Skúgvi, og leygardagin hendi tað aftur. Tí valdi Inga Tórarenni, sum býr í Skúgvi, at filma útlendsku ferðafólkini, tí tey millum annað stungu myndatól í lundaholur. 

Tað harmar Ingu Tórarenni, at náttúran og fuglalívið í Skúgvi verður viðfarið soleiðis, og tað gjørdu hon eisini greitt fyri útlendsku ferðafólkunum.

Í fjør heyst varð skipað fyri borgarafundi í Skúgvi, um at  skipa oynna sum verndarøki.

Tað vóru Skúvoyar kommuna og hagastýrini í Skúvoy, sum høvdu heitt á Umhvørvisstovuna um at verja oynna við heimild í Náttúruverndarlógini.

Á tí fundinum varð kunnað um tilgongdina, tá arbeitt verður við at gera eina verndarkunngerð, og hvussu fólk og aðrir áhugapartar kunnu veita upplýsingar, sum eru viðkomandi fyri skipan av verndini.

Vit hava tosað við umboð frá Umhvørvisstovuni í dag, og tey siga, at arbeitt verður víðari við hesi ætlan, men at tað ikki lá fyri at gera viðmerkingar til málið í dag.

Frammanundan er Skúgvi - eins og Nólsoy og Mykines - lýst sum Ramsar-øki, sum kom í gildi í 2017.

Í kunngerðini er ásett, at í tíðarskeiðinum frá 15. apríl til og við 31. august er bannað at sigla skjótari enn átta fjórðingar um tíman nærri enn 500 metrar úr landi kring alla oynna í Skúvoy og Mykinesi og kring partar av Nólsoy. 

Óneyðugur gangur, til dømis harður tónleikur og sigling við vatnskootarum, er eisini bannaður í nevnda tíðarskeiði.

Endamálið er at geva fugli, sum reiðrast, frið.