Antonio Costa: Skal ganga skjótari at gera Ukraina lim í ES

"Nú skulu vit seta ferð á tað praktiska arbeiðið. Vit skulu økja og styrkja okkara hernaðarliga stuðul til Ukraina og tað skal ganga skjótari at gera Ukraina til lim í Evropa Samveldinum" Tað segði forsetin í Evroparáðnum, Antonio Costa á tíðindafundi í dag eftir at limalondini í Evropasamveldinum, hava fundast í dag. 

Forkvinnan í ES nevndini, Ursula von der Leyen, hevur áður sagt, at Ukraina kann gerast limur í Evropa samveldinum í 2030. 

Antonio Costa vil, at tað skal ganga skjótari enn so.

Limalondini í ES hava fundast, eftir at amerikanski forsetin Donald Trump og ukrainski forsetin Volodymyr Zelenskyj hittust í Hvítu Húsunum í gjár, saman við fleiri evropeiskum stjórnarleiðarum.

Á ES toppfundinum varð tosað um hvussu tey kunnu tryggja friðin í Ukraina. Antonio Costa, forseti í Evroparáðnum, nevdir, at tað skal gerast í tøttum samstarvi við Samgonguna av teimum fúsu. Í hesari samgonguni eru stjórnarleiðarar um allan heim, sum stuðla varandi friði í Ukraina. 

Fleiri stjórnarleiðarar í "samgonguni av teimum fúsu" hava boðað frá, at tey eru klár at senda hermenn til Ukraina, um ein friðaravtala kemur í lag - hetta sum ein liður í framtíðartrygdini og friðnum í Ukraina. 

Tað er millum annað forsætisráðharrin í Estlandi, Kristen Michal, og finska uttanríkisráðfrúan, Elina Valtonen, sum hava boðað frá, at londini eru til reiðar at senda hermenn. 

Á ES toppfundinum varð eisini tosað um nýggjar sanktiónur móti Russlandi, til tess at steðga krígnum. Uttanríkisstjórin í ES, Kaja Kallas, hevur boðað frá, Evropa Samveldið fer at seta revsitiltøk í verk í september.