Russland hóttir Norra

Russland hóttir nú Norra og norsk fiskiskip, at tey ikki sleppa í russiskan sjógv. Tað er russiska tíðindastovan Tass, sum ber tíðindini, og norska Fiskeribladet umframt aðrir norskir miðlar skriva um málið. 

- Um Norra ikki broytir støðu innan ein mánað, fer Russland at steingja tey góðu fiskiøkini fyri norskum fiskiskipum. Tað sigur Ilja Sjestakov, ovastin fyri russiska fiskimaálaráðið við Tass. 

Hetta er ein avleiðing av, at Norra hevur stongt sínar havnir fyri russisku reiðaríðini Norebo JSC og Murman Seafood. Russisku reiðaríðini og russiskir myndugleikar hava mótmælt harðliga, men higartil hevur tað ikki broytt nakað sum helst. Tað eru júst somu reiðaríð, sum Føroya landsstýrið ætlar at seta á svartalista. Uppskotið kemur til fyrstu viðgerð í morgin.

Ilja Sjestakov sigur við Tass, at útistongsulin er eitt grovt brot á galdandi avtalur um at røkja stovnin. Russland hóttir eisini við at áseta sær egnar kvotur í Barentshavinum og Norskahavinum.

- Tað eru tey russisku áhugamálini sum gera av, hvussu fiskiskapurin og býti av kvotum verður í Barentshavinum og Norskahavinum, sigur Sjestakov við Tass.

Flestu føroysku veljararnir eru fyri at leingja fiskiveiðuavtaluna við russar. Tað skrivar portal.fo Í veljarakanningini, sum Spyr.fo hevur gjørt fyri Portalin, varð eisini spurt um hugburðin hjá føroyska veljaranum til Russlandssáttmálan. “Heldur tú, at fiskiveiðiavtalan millum Føroyar og Russland skal halda fram komandi ár?”, ljóðaði spurningurin.

46 prosent svaraðu “ja”, 30 prosent “nei” og 24 prosent svaraðu “veit ikki”.