Roknskaparlóg á føroyskum er á veg

Nýggj ársroknskaparlóg er á veg.

Og hon verður á føroyskum.

Ársroknskaparlógin verður tillagað til nýggju fyriskipanina um roknskap hjá ES og nýggjastu fyriskipan hjá ES um altjóða aðalkrøv um roknskap.

Nakrir umsitingarligir lættar koma fyri fyritøkur, sigur Uttanríkis- og Vinnumálaráðið.

Allar fyritøkur, sum ársroknskaparlógin umfatar, skulu upplýsa miðaltalið av heiltíðarsettum starvsfólkum.

Landsstýrisfólkið kann áseta reglur um, at fyritøkur skulu lata Skrásetingini upplýsingar um nettosøluna. 

Enn er ikki greitt, hvussu hendan fráboðan kann vera.

Men Uttanríkis- og Vinnumálaráðið sigur, at tað miðar eftir at finna eina skynsama loysn, sum ikki er ov tyngjandi hjá fyritøkunum.

Landsstýrisfólkið kann eisini áseta reglur um, at fyritøkur, sum eru skrásettar í einum keypsskála, kunnu lata Skrásetingini ársfrásøgnina á enskum.

Nú ársroknskaparlógin verður broytt, vera eisini broytingar og rættingar gjørdar í grannskoðaralógini, vinnufelagalógini og øðrum lógum.