Landsverk: Suðuroyartunnilin verður kroystur ígjøgnum

Landsverk sigur seg ikki hava fingið nóg gott tilfar til at kunna góðkenna Suðuroyartunnilin.

Í høvuðsheitum, tí óheftir partar ikki hava gjørt tilfarið.

Tað er annars ein treyt í slíkum førum.

Hetta hevur tunnilsfelagið fingið at vita tvær ferðir frá Landsverki.

Tað sæst í svari frá Landsverki til Løgmansskrivstovuna, sum spurdi, hvat Landsverk meinar við, tá stovnurin sigur, at tilfarið ikki er nøktandi til góðkenningararbeiðið.

Landsverk

Frítekst tagging: 

Landsverk

Bjarni Árting Rubeksen

Verður skundað ígjøgnum

Í samskifti millum Løgmansskrivstovuna og Landsverk, sigur Landsverk, at arbeiðið við Suðuroyartunlinum verður skundað ígjøgnum, hóast grundleggjandi spurningar framvegis standa ósvaraðir.

Stovnurin heldur, at myndugleikagóðkenning eigur at verða avgreidd, áðrenn farið verður víðari við projektering og útboði av tunlinum. Sambært Landsverki er tíðarramman ov stutt, og tí er grundarlagið ikki nóg búgvið til næsta stig í verkætlanini.

Landsverk staðfestir eisini, at tey ikki hava fingið allar neyðugar upplýsingar frá tunnilsfelagnum, og at nógv ivamál um trygd og loysnir framvegis standa ósvarað.

Serliga er tað trygdin, sum Landsverk fylist á. Landsverk vísir á, at tað enn er ógreitt, hvørjar reglur skulu vera galdandi - føroyskar ella ES-direktiv - og hvørjar loysnir skulu veljast, eitt nú við sprinklarum, ventilatión og rýmingarleiðum. Landsverk heldur, at hesir spurningar eiga at verða avkláraðir, áðrenn arbeiðið heldur fram. 

Samstundis ger Landsverk greitt, at stovnurin ikki vil enda í einari støðu, har hann bert góðkennir eina longu tikna politiska avgerð. 

Tunnilin kroystur ígjøgnum

Harafturat ávarar Landsverk um stóra óvissu, tá tað snýr seg um kostnaðin. Endaligi prísurin er treytaður av óavkláraðum trygdarloysnum og jarðfrøðiligum viðurskiftum, og stovnurin sigur beinleiðis, at kostnaðurin kann broytast munandi - alt eftir hvørjar loysnir verða valdar.

Í stuttum sigur Landsverk, at Suðuroyartunnilin verður kroystur ígjøgnum, hóast grundleggjandi ivamál eri um trygd, linjuføring, og eftirlýsir eisini, at málið um Suðuroyartunnilin verður lýst sum ein samlað verkætlan, eitt nú við loysnum viðvíkjandi tilhoyrandi vegakervi og tunlum í Sandoynni og Suðuroynni.