Túsundtals síður av skjølum í Epstein-málinum kunngjørd

Eftirlitsnevndin í amerikonsku kongressini hevur almannakunngjørt meira enn 33.000 síður av skjølum, sum hava við Jeffrey Epstein at gera. Meginparturin av skjølunum hevur longu verið frammi alment.

Hetta hendir eftir at formaðurin í nevndini, republikanarin James Comer, í august heitti á amerikanska løgmálaráðið um at almannakunngera skjøl um Epstein og Ghislaine Maxwell, fyrrverandi unnustu og hjálparkvinnu hjá Epstein.

Jeffrey Epstein

Jeffrey Epstein og Ghislaine Maxwell, fyrrverandi unnusta og hjálparkvinna hjá Epstein. (Mynd: ABC News)

Alment kend

Men flestu tekstskjølini, sum nevndin hevur lagt fram, eru longu alment kend, skrivar tíðindastovan AP.

Umframt tekst er talan um myndir og sjónbond. 

AP skrivar, at talan er um myndafílur við fleiri ára gomlum løgfrøðiligum skjølum, sum hava við Epstein og Maxwell at gera. 

Har eru eisini videofílur, sum tykjast vera upptøkur av kropsmyndatólum frá rannsóknararbeiðnum hjá løgregluni, umframt samrøður hjá løgregluni við offur, hvørs andlit eru sjónlig.

Linkar neyvan trýstið

Tað fer væntandi ikki at linka trýstið á limirnar í kongressini, um at fáa størri gjøgnumskygni í málinum, nú skjøl eru almannakunngjørd. 

Republikanski leiðarin í tinginum, Mike Johnson, roynir at forða fyri einum átaki frá demokratum og nøkrum republikanarum um atkvøðugreiðslu um eitt lógaruppskot, sum skal krevja, at løgmálaráðið almannakunnger allar upplýsingar í sonevndu Epstein-fílunum, undantikið persónligar upplýsingar um offur.

Ríki handilsmaðurin, Jeffrey Epstein, varð dømdur fyri kynslig brotsverk og menniskjahandil við ungdómi, tá hann doyði í einum fongsli í New York í 2019.

Ghislaine Maxwell var í 2021 funnin sek í at hava menniskjahandlað ungar gentur fyri Epstein. Hon var dømd 20 ára fongsulsrevsing.