Brúk fyri 450 røktarstarvsfólkum um tíggju ár

Brúk verður fyri 450 fleiri ársverkum til røktina á eldraøkinum um tíggju ár.

Og tá eru tey, sum fara frá fyri aldur, ikki tald við.

Tað sigur Búskaparráðið.

Tað heldur, at land og kommunur eiga at gera ætlanir um, hvussu arbeiðsútboðið á eldraøkinum kann vaksa.

Tað kann gerast bæði við at fáa starvsfólkini upp í tíð og seta fleiri starvsfólk. Og byggja størri røktarheim. 

950 ársverk í fjør

Í fjør vóru ársverkini 950. 75 ársverk vóru yvir pensjónsaldur. Næstu tíggju árini fara 230 ársverk at røkka pensjónsaldri.

150 ársverk komu aftrat í heimahjálpini frá 2016 til 2024.

Men talið av heilsurøktarum, heilsuhjálparum og sjúkrarøktarfrøðingum hevur nærum staðið í stað. Heimahjálpararnir eru ikki útbúnir í røkt.

Tí hevur gongdin seinastu árini verið, at alsamt fleri røktarstarvsfólk ikki eru útbúgvin, sigur Búskaparráðið.