Verjumálaráðharrin: Ukraina má fáa størri hernaðarliga hjálp

Danski verjumálaráðharrin, Troels Lund Poulsen, er stúrin um støðuna, sum staðfestir, at evropeiski stuðulin til Ukraina er nógv minkaður seinastu tíðina. 

Ein frágreiðing frá Kiel-stovninum, sum fylgir við, hvussu nógv lond lata Ukraina, vísir, at stuðulin í juli og august minkaði 57 prosent samanborið við fyrra hálvár í ár,

- Fær Ukraina ikki størri hjálp, vikna stríðevnini hjá landinum nógv, sigur Troels Lund Poulsen, sum í dag hittir Nato-starvsfelagar í Brússel.

Danmark latið 67 mia. kr. 

Danmark er millum tey londini, sum hava latið Ukraina mestan stuðul. Síðani Russland leyp á Ukraina, hevur Danmark latið Ukraina 67,6 milliardir kr. í hernaðarligum stuðli.

Og londini, sum keypa flest amerikansk vápn, sum síðani verða latin Ukraina, eru Svøríki. Noreg, Kanada, Týskland og Danmark.

- Men neyðugt er, at fleiri Nato-lond rinda meira, ikki minst fyri at fáa USA vera við, tí amerikanska umsitingin hevur gjørt greitt, at USA fer ikki at fíggja vápn til Ukraina, sigur Troels Lund Poulsen