Virðislønir M.A. Jacobsens handaðar mikudagin

Mikudagin 22. oktober klokkan 17 verða virðislønir M. A. Jacobsens og barnamentanarheiðursløn Tórshavnar býráðs latnar í Müllers Pakkhúsi.  

Til handanina kemur Tórshavnar kamarkór, sum verður 40 ár í ár, at syngja, og Heidi Lava Elgeirsdóttir, forkvinna í mentanarnevndini hjá Tórshavnar býráði, bjóðar vælkomin.

Elsa Berg, borgarstjóri, handar virðislønirnar.  

Fýra heiðurslønir latast 

Fýra heiðurslønir verða latnar. Talan er um M. A. Jacobsens virðisløn fyri yrkisbókmentir, virðisløn fyri fagrar bókmentir og virðisløn fyri mentanaravrik. Síðani verður latin barnamentanarheiðursløn Tórshavnar býráðs. 

Virðisløn verður latin fyri fagurbókmentaligt verk, fyri yrkisbókmentaligt verk, og fyri annað mentanaravrik. Hetta seinasta er t.d. bygdasøgur, endurminningar og verk um myndlist ella tónlist. Tær kunnu eisini latast fólki, sum verður mett at hava avrikað nógv fyri føroyska mentan á móðurmálinum. 

Tað er treyt, at virðislønarverdu verkini eru skrivað á føroyskum máli. Hava føroyskir rithøvundar skrivað og givið út á útlendskum máli, eiga tær at verða týddar, áðrenn tær koma til umrøðu í virðislønarnevndini. Virðislønir fyri fagrar bókmentir og yrkisbókmentir kunnu bert latast fyri verk, sum eru útgivin. 

Fyrsta virðislønin varð latin í 1958. Tað var Rithøvundafelagið, sum heitti á Tórshavnar býráð um at stovna eina árliga bókmentavirðisløn. Virðislønin skuldi bera navn eftir mentamannin Mads Andrias Jacobsen, ið m.a. var rithøvundur, lærari, bókavørður og borgarstjóri í Havn.  
Barnamentanarheiðursløn Tórshavnar býráðs varð latin fyrstu ferð í 1976. 

Kringvarpið sendir beinleiðis 

Vit senda beinleiðis í útvarpi og sjónvarpi, tá Mentanarvirðislønir M.A. Jacobsens og Barnamentanarheiðurslønir Tórshavnar býráðs 2025 verða handaðar í Müllers Pakkhúsi. 

Hetta merkir eisini, at mentanarsendingin Kultura ikki verður at hoyra mikudagin, tí virðislønahandanin verður send í staðin. 

Kringvarpið sendir sum vant sjónvarp til børnini, tá handanin er av.