Barnaverndartænastan í VEKS fær álvarsliga átalu frá Dátueftirlitinum

Dátueftirlitið hevur givið barnaverndartænastuni í VEKS-samstarvinum eina álvarsliga átalu. Hetta hendir eftir eina klagu frá einum borgara, sum metti, at trúnaðarupplýsingar vórðu lætnar einum fyrrverandi maka uttan loyvi.

Barnaverndartænastan sigur, at upplýsingarnar vórðu lætnar, tí viðkomandi hevði felags foreldramyndugleika, og tí hevði rætt til partsinnlit. 

Nakrar upplýsingar vóru strikaðar, men Dátueftirlitið slær fast, at barnaverndartænastan ikki skjalfesti, hvussu hon gjørdi sína meting.

Dátueftirlitið staðfestir eisini, at barnaverndartænastan hevur sagt seg hava mannagongdir til slíkar avgerðir, men at hesar ikki vórðu brúktar í hesum málinum.

Manglandi skjalprógvan og ógreiðar arbeiðsgongdir gera, at Dátueftirlitið nú gevur barnaverndartænastuni í VEKS eina álvarsliga átalu.

Vestmanna-, Eiðis, Kvíkvíkar og Sunda kommuna samstarva um barnaverndartænastuna, sambært galdandi lóg um barnavernd.