Skulu rinda størri veiðigjald, hóast kvoturnar minka

Nú er uppskotið um at strika ásetingina um minni veiðigjald, tá kvotur minka serliga nógv, komið í løgtingið.

Lógin, sum hon er nú, sigur, at fer tøka kvotan niður um 50 prosent av miðalkvotuni, sum er sett seinastu fimm árini, fer veiðigjaldið niður í helvt.

Hetta hendi við veiðigjaldinum fyri norðhavssildina í ár.

Fyri at sleppa undan hesum ætlar landsstýrið at broyta veiðigjaldslógina.

Galdandi lóggáva leggur ikki upp fyri, at hægri prísur ofta vigar upp ímóti minni kvotu, sigur landsstýrið.

Makrelprísurin meira enn tvífaldaður

Og í løtuni er júst tað støðan. Eftir semjuna um makrelin, er prísurin á makreli meira enn tvífaldaður.

Semjan ger eisini, at fiskast kann meira effektivt.

Samstundis verður veiðigjaldið ásett eftir avreiðingarvirðinum fyri árið frammanundan. 

Ásetingin virkar tí móti sínum endamáli, sigur landsstýrið.

Fer at geva millum 50 og 90 milliónir

Tað heldur tað eisini vera óheppið, at avtalur, sum Føroyar gera við onnur lond um, hvussu fiskurin skal býtast, skal hava so stóra ávirkan á veiðigjaldið. 

Fyribils roknar Fíggjarmálaráðið við, at uppskotið gevur landskassanum millum 50 og 90 mió. kr.

Les alt uppskotið her.