Føroyar hava annan armin í miðumfarinum

Føroyar hava nú annan armin og reiðiliga tað í miðumfarinum av EM-endaspælinum. 

Føroysku menninir vunnu fyrr í dag stórsigur 37-24 á Montenegro, og fyri lítlari løtu síðan var greitt, at Slovenia fór avstað við báðum stigunum í dystinum ímóti Sveis. Eftir at Sveis var frammanfyri við átta málum, endaði alt við, at Slovenia kom afturíaftur og vann 38-35.

Tað merkir, at Slovenia er fremst í bólkinum við 4 stigum, Føroyar eru nummar tvey við trimum, Sveis eru á 3. plássi við einum stigi og Montenegro er aftast við ongum.

Tvey tey fremstu liðini fara víðari til Malmø, og Sveis er sostatt einasta liðið, sum kann fáa Føroyar aftur á stigatalvuni. Innanhýsis dysturin millum Føroyar og Sveis endaði við javnleiki, og tí verður málúrtøkan avgerandi.

Føroyar vunnu sær 13 mál á plusskontuna ímóti Montenegro, meðan Sveis endaði við minus trimum. Sostatt skal Sveis vinna á Montenegro í síðsta umfarinum í bólkaspælinum týsdagin, meðan Føroyar skulu tapa ímóti Slovenia, um tað skal eydnast Sveis at koppa Føroyum. Ikki nóg mikið við tí. Hetta skal vera við tilsamans 16 málum til fyrimunar fyri Sveis.

Ikki heilt óhugsandi, men rættiliga ósannlíkt, sum gongdin hevur verið higartil. Livst so spyrst.