Grindadráp er lex specialis

Grindadrápið í Hvannasundi í fjør summar eigur at viðgerast eftir grindalógini og ikki eftir lógini um djóravælferð.

Tað sigur Tilfeingis- og Vinnumálaráðið í skrivi til politiið.

Tað sigur, at soleiðis er lógartulkingin. 

Sýslumaður og grindamenn eru skuldsettir fyri at bróta lógina um djóravælferð í einum grindadrápi í Hvannasundi í fjør summar.

Lex

Er talan um lógarbrot, skal tað viðgerast eftir grindalógini, sigur Tilfeingis- og Vinnumálaráðið.

Tað sama siga tingmenn úr øllum flokkum, sum fyrst í desember komu við uppskoti til samtyktar um tað, sum teir kalla at verja rættin at veiða villini djór.

Teir biðja landsstýrið broyta lóggávuna soleiðis, at bara grindalógin er galdandi fyri grindadráp.

Tað uppskotið er enn í vinnunevndini, hóast freistin at koma við áliti var 10. januar. 

Tilfeingis- og Vinnumálaráðið sigur, at lógin um djóravælferð er ein yvirskipað lóg, ein lex generalis, sum slíkt eitur í løgfrøðini.

Grindalógin er ein serlóg, ein lex specialis.

Og í hesum ítøkiliga føri gongur lex specialis fram um lex generalis, sigur Tilfeingis- og Vinnumálaráðið.