Vanlukkan umborð á Glyvursnesi: Niðurstøða kemur um hálvt ár

Á nýggjárinum skuldi ein kanning fyriliggja frá donsku skaðanevndini um vanlukkuna umborð á farmaskipinum Glyvursnesi, 2. januar í fjør.

Men stórt arbeiðstrýst hevur gjørt, at hon er seinkað. Kortini er ein dagføring gjørd, sum lýsir, hvat hendi sjálvan skaðadagin.

2. januar í fjør lá farmskaipið hjá Smyril Line, Glyvursnes, við bryggju í Hirtshals, har ymiskt viðlíkahaldsarbeiði varð gjørt umborð.

Manningin arbeiddi millum annað upp á eina oljuhitaskipan, sum hitar bæði brennievni og sjálvt skipið.

Trupulleikar høvdu verið við skipanini, tí brenniolja var likin inn í stongdu skipanina. Tríggir av manningini arbeiddu við at fáa skipanina at virka aftur, sum hon skuldi. Millum annað vóru nøkur av rørunum og ventilunum tipt.

Glyvursnes, farmaskip

Spreinging umborð

Tað var undir hesum arbeiði, at tað brádliga hendi ein spreinging, og ógvusligur kom eldur í.

Tveir av maskinmeistarunum fingu skaða. 1. meistarin doyði, og maskinstjórin fekk álvarsligar brunaskaðar. Allur streymurin fór umborð á skipinum í sambandi við spreingingina.

Umfatandi bjargingararbeiði varð sett í verk av manningini og sløkkiliði av landi.

Føroyska Sjóvinnustýrið heitti á donsku skaðanevndina at kanna hendingina nærri, og trý fólk vóru send at kanna vanlukkuna. Samrøður vóru gjørdar við manning, avvarðandi og reiðarí, umframt av sjálvum vanlukkustaðnum.

Ikki komin á mál

Enn er skaðanevndin ikki komin á mál við sínum arbeiði, sum millum annað skal lýsa standin, skipið var í, hvørjar mannagongdir vóru brúktar, hvussu viðlíkahaldið var umborð, royndum av oljuni, og annars at greina nærri, hví vanlukkan hendi.

Í stuttu fyribilsfrágreiðingini frá skaðanevndini stendur, at vanliga verður niðurstøða gjørd, áðrenn eitt árt er farið. Ov stórt arbeiðstrýst hevur tó gjørt, at hetta ikki læt seg gera í hesum føri, men at endalig niðurstøða helst fyriliggur innan seks mánaðir.