Skipanes verður umvælt í Hongkong

Skipanes hjá Smyril Line hevði last umborð, millum annað umleið 900 elbilar, tá eldur kom í hann fyrr í hesum mánaðinum.

Skipanes kemur til Hongkong í morginári.

Har skal skaðin, sum skipið fekk, umvælast, sigur stjórin í Smyril Line, Jens Meinhard Rasmussen.

Hann skrivar í sms-boðum, at skaðin er avmarkaður, og roknað verður við, at umvælingararbeiðið fer at taka seks til átta vikur.

Skipanes er lastaður, og umborð eru millum annað umleið 900 el-bilar, sigur Jens Meinhard Rasmussen.

Eingin fólkaskaði

Sambært Vesselfinder og Marinetraffic er Skipanes á veg til Hongkong úr Kina. Skipið fór úr Xiamen í Kina mikunáttina.

2. september kom eldur í maskinrúmið hjá Skipanesi. Hann var skjótt sløktur.

Eingin fólkaskaði var. Í manningini eru 23 mans.

Skipanes, sum er á veg til Føroya úr Kina, har skipið er bygt, var 20 fjórðingar úti fyri Taivan, og fór inn á skipasmiðju í Kina at verða kannað.