Havbúnaðarfelagið góðtekur ikki at tøma heil alibrúk

Havbúnaðarfelagið góðtekur ikki, at heil alibrúk kunnu verða tømd, hóast fiskurin ikki er staðfestur at vera sjúkur.

Felagið fegnast tó um, at tíðin, sum alibrúk, har laksasjúkan ILA er staðfest, skulu liggja still, skal fara niður í helvt.

Hon skal fara úr seks mánaðum niður í tríggjar mánaðir.

Men Havbúnaðarfelagið heldur ikki, at tað er rætt at tøma heil alibrúk, hóast ILA ikki er staðfest í øllum ringunum.

Ov víðgongt krav

Kravið um, at frískur fiskur skal takast ella burturbeinast, er alt ov víðgongt og óproportionel áseting, sigur felagið.

Tað sigur seg oftari enn eina ferð hava víst á hetta.

Og tað ger Havbúnaðarfelagið nú aftur í hoyringarskrivi um at stytta brakkleggingartíðina.

Havbúnaðarfelagið minnir á, at landsdjóralæknin áður hevur givið vinnuni lyfti um at hava fund um hetta mál.  Fundarinnbjóðingini er tó ikki komin enn.