Sonur Khamanei verður nýggjur leiðari í Iran

Prestastýrið í Iran hevur valt nýggjan ovasta leiðara fyri Ali Khamenei, ayatollah, sum var dripin, tá ið Ísrael og USA lupu á Iran fyri tíggju døgum síðani.

Tað er tann 56 ára gamli sonur Khamenei, Mojtaba Khamenei, sum fer at taka við eftir faðir sín.

Mojtaba Khamanei hevur higartil ikki gjørt vart við seg alment, men hann hevur í nógv ár verið ein avgerandi persónur aftan fyri leiktjøldini í Iran. Sterkur og dugnaligur, skriva miðlar sum New York Times og BBC.

Stutt eftir at Mojhtaba Khamanei var tilnevndur í gjárkvøldið, boðaði kollveltingarliga tjóðarhirðin frá, at hon fer at fylgja Mojtaba Khamanei. Væntað verður, at kollveltingarhirðin fer at fáa víðkaðar heimildir undir nýggju leiðsluni.

Amerikanska forsetin Donald Trump hevur sagt, at hann ikki kann góðtaka sonin hjá Ali Khamenei sum ovasta leiðara fyri Iran.