Heilsustýrið: Lógin um solarium skal dagførast

Eitt tað fyrsta, sum Almanna- og Heilsumálaráðið - um tað framvegis eitur so - fær eftir valið, verður tilmæli frá Heilsustýrinum um at dagføra solariumlógina frá 2015.

Sigast kann stutt um tilmælið, at Heilsustýrið mælir til, at solariumlógin verður víðkað til at fevna um allar veitarar av sóllampum til kosmetiskt endamál.

Aldursmarkið skal vera 18 ár, sigur Heilsustýrið.

Umframt hetta verður mælt til, at greið regulering, skráseting og eftirlit vera sum í øðrum londum í Evropa.

Vandi fyri móðurmerkjakrabba

Heilsustýrið sigur, at tey, sum brúka sóllampur, solarium, eru í 20 prosent størri vanda fyri at fáa móðurmerkjakrabba.

Brúka tey solarium, áðrenn tey eru 35, er vandin 59 prosent.

Vandin er eisini størri fyri at fáa annan húðkrabba.

Á heimasíðuni hjá Heilsustýrinum eru ráð um, nær, fólk ikki skulu brúka solarium.