USA virðir ísraelsku lógina um deyðarevsing

USA sigur seg virða rættin hjá Ísrael at gera sínar egnu lógir, eftir at Ísrael hevur samtykt deyðarevsing fyri palestinar, sum í hernaðardómstólinum eru dømdir fyri dráp.

- USA virðir avgerðarrættin hjá Ísrael at áseta sínar egnu lógir og revsingar fyri einstaklingar, sum eru dømdir fyri yvirgang, sigur talsmaður fyri amerikanska uttanríkisráðið.

Ísraelska tjóðartingið Knesset samtykti í gjár deyðarevsing fyri tey, sum vera dømd fyri dráp - ein lóg, sum bert er galdandi fyri palestinar.

Tó skunnu undantøk vera í serligum førum, stendur í lógaruppskotinum.

96 prosent av palestinarum, sum eru ákærdir í ísraelskum dómstólum, verda dømdir sekir, sigur ísraelski mannarættindafelagsskapurin B-Tselem.

Fremjast 90 dagar eftir dóm

Sambært lógaruppskotinum, skal deyðarevsingin fremjast innan 90 dagar eftir dóm.

Seinastu dagarnar hava fleiri evropisk lond kallað uppskotið fyri diskriminerandi. 

Bretland, Frakland, Týskland og Italia ávaraðu í felags fráboðan sunnudagin um, at lógin kann vera í stríð við demokratisku skyldurnar hjá Ísrael. 

John Peder Egenæs, aðalskrivari í Amnesty í Noregi, er púra avgjørdur.

- Tað er greitt brot á rættin til lívið. Og um tað hendir gjøgnum hernaðardómstólar, kann tað eisini vera krígsbrotsverk, sigur Egenæs.

Lógin skotin inn fyri hægstarætt

Í gjár skeyt ísraelski mannarættindafelagsskapurin, Association for Civil Rights in Israel, alt fyri eitt lógina inn fyri hægstarætt, og kravdi, at hon skal ógildast.

Á pappírinum er deyðarevsing í Ísrael fyri nøkur fá brotsverk, men eingin er avrættaður í landinum síðani Holocaust-dømdi Adolf Eichmann í 1962, skrivar norska TV2.