Trump ætlar at herða reglurnar fyri at brævatkvøða á miðvalinum

Amerikanski forsetin, Donald Trump, ætlar at herða reglurnar fyri at brævatkvøða í USA undan miðvalinum í novembur, og skrivaði tí í gjár undir eina fyriskipan, sum hevur til endamáls at gera júst tað.

Tað skriva tíðindastovurnar Reuters og Ritzau.

Sambært fyriskipanini, skulu brævbjálvar við atkvøðuseðlunum til brævatkvøður hava eina serliga strikukotu, so teir kunnu finnast, og ein listi skal gerast við teimum amerikonsku ríkisborgarunum, sum hava rætt at brævatkvøða.

Løgfrøðiligar avbjóðingar

Í USA eru tað tó statirnir, sum hava ábyrgd av valskipanunum, og sambært Reuters eru nógv, sum vænta. at ein slíkt broyting fer at hava við sær løgfrøðiligar avbjóðingar.

Trump hevur mælt til, at reglurnar fyri brævatkvøður skulu herðast undan miðvalinum í novembur. Orsøkin er óskjalprógvaðu uppáhald hansara um, at valsvik var orsøkin til ósigur hansara á forsetavalinum í 2020.