Føroyskur hermaður í Ukraina: "Merkiliga friðarligt"

Bjørn Kallsoy, føroyskur hermaður í Ukraina, hevur júst verið á eini 20-daga missjón á hermótinum í Eysturukraina, og tað hevur verið merkiliga friðarligt á hermótinum hesa ferð, sigur hann.

Russland er annars farið í holt við síni várálop í Ukraina, men tað gongur ikki heilt eftir vild, tí ukrainar brúka alsamt meira dronur á hermótinum, og tað ger tað torført hjá russum at bróta ígjøgnum ukrainsku verjuna.

Ukraina hevur tikið land aftur á hermótinum, samstundis sum russar missa fleiri hermenn, enn teir megna at kalla inn til hertænastu.

Og tað er harðrendi málsetningurin hjá Ukraina fyri í ár,- at fyri hvønn ukraina, sum letur lív á hermótinum, so skulu fimm russar missa lívið, sigur Claus Mathiesen, lektari á danska verjuháskúlanum við danska kringvarpið.