VÍF í finaluna - H71 ein dyst frá FM

Somu lið, sum spældu steypafinalu í februar, skulu kappast um meistaraheitið í bestu hondbóltsdeildini við kvinnum. 

Við 26-25 sigri á H71 í Hoyvík í gjárkvøldið, vann VÍF sær rættin at spæla í FM-finalunum ímóti Kyndli, sum sendi Neistan úr kappingini síðsta vikuskiftið.

Dysturin í Hoyvíkshøllini var sera javnur, og avgerðin fall ikki, fyrrenn Fríða Nolsøe Olsen sendi eitt brotsskast í netið 15 sekund fyri dystarlok.

Fyrsta FM-finalan millum Kyndil og VÍF verður á Hálsi í Havn sunnudagin.

H71 ein dyst frá meistaraheitinum

Hjá monnunum hevur H71 beina kós móti føroyameistaraheitinum.

Hoyvíkingar vunnu 31-24 ímóti Kyndli í høllini á Hálsi í gjárkvøldið og hava sostatt vunnið tvær tær fyrstu FM-finalurnar.

Kyndil kom nógv betur frá byrjan og var á odda við fimm málum, tá smáir níggju minuttir vóru spældir, men eitt longu eitt korter seinni yvirhálaði H71 og eftir tað høvdu hoyvíkingar ongar trupulleikar. 

Nú kann H71 vinna FM-heitið í Hoyvíkshøllini sunnudagin.