Kommunufelagið: Nýggja tilboðið frá Heilsuskúla Føroya er loysnin

Trotið á útbúnum starvsfólki á eldraøkinum er stórt, og Tórbjørn Jacobsen, formaður í Kommunufelagnum, heldur, at nýggja tilboðið frá Heilsuskúla Føroya, har partur av undirvísingini verður í Havn og við fjarundirvísing, verður loysnin frameftir.

Tórbjørn Jacobsen, formaður í Kommunufelagnum, var landsstýrismaður í mentamálum, tá avgerð varð tikin um, at Heilsuskúli Føroya skuldi vera í Suðuroy.

Og hann heldur ikki, at tað við dagsins tøkni eigur at vera avgerandi, júst hvar ein skúli er staddur.

Tórbjørn Jacobsen heldur, at tað hevur skund at gera nakað fyri at nøkta tørvin á útbúnum starvsfólki á eldraøkinum.

Vil sleppa undan at fara til Suðuroyar

Men útbúgvingin hjá Heilsuskúla Føroya er ikki hóskandi fyri øll. Arnleyg Tungá ynskir at sleppa á Heilsuskúlan at lesa. Men hjá henni er ikki gjørligt at fara til Suðuroyar.

Og nýggja tilboðið hjá Heilsuskúlanum, har partur av útbúgvingini verður tikin í Havn, riggar heldur ikki hjá henni.

Hjá henni hevði tað hóskað betur, um hon slapp undan at fara til Suðuroyar, og um hon kundi tikið útbúgvingina yvir longri tíð enn vanligt.