ES setur tiltøk í verk móti russum fyri at hava burturflutt ukrainsk børn

ES hevur lýst tiltøk móti 16 russiskum ríkisborgarum og sjey felagsskapum, sum revsing fyri, at tey skulu hava burturflutt nærum 20.500 ukrainsk børn.

- Hesar gerðir eru álvarslig brot á fólkarættin og rættindi hjá børnum, og endamálið er at strika ukrainska samleikan og komandi ukrainsk ættarlið, stendur í fráboðanini.

Millum annað eru revsitiltøk sett í verk móti fleiri stovnum, sum eru knýttir at russiska undirvísingarmálaráðnum. Tiltøk eru eisini sett í verk ímóti politikarum og embætisfólkum úr russiskt-hersettum økjum og leiðarum fyri ungdómsfelagsskapum.

Ognir hjá fólkum og felagsskapum, sum eru á listanum, vera frystar, og ES-borgarar og fyritøkur hava fingið forboð at handla við tey og at veita teimum fígging, skrivar NTB-tíðindastovan.