Vance: Eftirlitsfólk frá kjarnorkustovninum fara aftur til Iran

Iran hevur játtað at bjóða eftirlitsfólki frá altjóða kjarnorkustovninum hjá ST, IAEA, aftur til landið. 

Tað segði amerikanski varaforsetin, J.D. Vance, í gjár, eftir samráðingarnar um vikuskiftið millum USA og Iran í Sveis.

Partarnir skrivaðu herfyri undir avtalu um vápnahvíld. 

Í avtaluni er staðfest, at bardagar á øllum hermótum skulu steðga, og at farast skal undir samráðingar um millum annað eru Hormuzsundið og kjarnorkuvirksemið í Iran.
 
Samráðingarnar um vikuskiftið vóru hildnar, hóast iranski herurin boðaði frá, at Hormuzsundið varð stongt, av tí at Ísrael heldur fram at leypa á Hizbollah har suðri í Libanon. 

Men sambært Al Jazeera hevur verið friðarligt í Libanon síðani leygarkvøldið.

Sleppa at selja gass og brennievni

- At kjarnorkustovnurin, IAEA, sleppur aftur til Iran, er fyrsta stigið á leiðini at enda iransku kjarnorkuverkætlanina, sigur amerikanski varaforsetin, J. D. Vance. 

Hann sigur eisini, sambært BBC, at USA fer ikki at forða Iran at selja gass og brennievni, meðan samráðst verður um frið.

Samráðingarnar eru settar til at vara í góðar 60 dagar - til 21. august. Semingsfólkini eru úr Pakistan og Katar.

Amerikanski varaforsetin er nøgdur við fystu samráðingarnar, og hann segði við tíðindafólk, at hann væntar, at eftirlitsfólk frá kjarnorkustovninum fara til Iran í hesi vikuni. 

Enn hevur Iran ikki váttað, at eftirlitsfólk frá IAEA sleppa inn aftur í landið.