Ringastu jarðskjálvtar í Venesuela í meiri enn eina øld

Jarðskjálvtavanlukkan í Venesuela hevur higartil kravt umleið 235 mannalív, sigur Carlos Alvarado, heilsumálaráðharri.

Fleiri enn 4.300 fólk eru løstað, skrivar AP-tíðndastovan.

Tveir harðir jarðskjálvtar raktu norðara part av Venesuela mikukvøldið. Fyrri skjálvtin máldi 7,2 á Richter-stiganum og tann seinni 7,5, og hetta eru ringastu jarðskjálvtar í Venesuela í meira enn 100 ár.

Høvuðsstaðurin Caracas og landsparturin La Guaira eru serliga hart raktir. Fleiri hundrað bygningar, av teimum minst átta sjúkrahús, eru lagdir í oyði, og floghavnin í høvuðsstaðnum er stongd.

Leita í húsatoftunum

Bjargingarfólk og sjálvboðin leita eftir fólki í húsatoftunum. Eingin hevur nakað yvirlit yvir støðuna, skrivar Reuters-tíðindastovan, sum eisini veit at siga, at á eini heimasíðu, sum er gjørd at hjálpa til við at finna fólk, sum eru horvin síðani jarðskjálvtarnar, standa nú fleiri enn 37.000 fólk.

Amerikanski jarðfrøðisstovnurin, US Geological Survey, hevur ávarað um, at endaliga talið á deyðum ivaleyst fer at økjast rættiliga munandi.

Vanlukkan rakar eitt land, sum longu frammanundan er viknað eftir búskaparliga kreppu í nógv ár, skrivar Reuters. Og tað ger hjálpararbeiðið munandi truplari.

Fleiri lond, teirra millum USA, hava lovað at senda neyðhjálp alt fyri eitt, og tey hava eisini sent bjargingarlið til Venesuela.

Og amerikanska stjórnin hevur eisin linkað revsitiltøkini móti landinum í eina tíð.