SF26: Andreas Odbjerg spælt fyrstu konsert í Føroyum

Andreas Odbjerg hevur fleiri ferðir áður fingið fyrispurningar um at koma til Føroyar at spæla, men hevur oftast takkað nei. Men í ár skuldi tað verða.

Á pallinum skemtaði kendi danski poppsangarin við føroyingum, og skýrdi teir góðar snapsagubbar.

Allastaðni, hann var komin, var snapsur boðin, og hetta dámdi honum væl. Hetta fortaldi Andreas eftir fyrstu sangirnar, og síðani bjóðaði hann fjøldini til eina ordans veitslu.

Náttúra og regn

Sjálvt í oysandi regni var Vágsbøur fullur av fólki.

Andreas Odbjerg rósti føroysku náttúruni og segði, at danska náttúran einki hevði at bjóða samanborið við Føroyar.

At spæla á Vágsbøi var, segði hann, sum at spæla í "outer space“.

Mariettudukkan Tobias

Til "STOR MAND“, sum Andreas Odbjerg vanliga syngur saman við Tobias Rahim, hevði Andreas eina marionettudúkku við á pallin. Dukkan tók sær av at syngja brotini hjá Tobias, og tað riggaði væl.

Andreas Odbjerg spældi eisini eina útgávu av einum lagi hjá Pil, sum hann spældi saman við henni á Roskilde Festivalinum fyrr í ár.

Latið Føroyar verða frælsar

Ein óvæntað løta kom, tá Andreas Odbjerg nevndi føroyskt sjálvstýri. Hann segði, at Føroyar sjálvandi skuldu vera ein sjálvstøðug tjóð, og at hann gleddi seg at koma aftur at spæla í Føroyum, tá Føroyar vóru eitt sjálvstøðugt land:

"Det er på tide at vi lader Færøerne være frie“, segði hann.

Kendi poppsangarin endaði við einum av sínum kendastu løgum, "I morgen er der også en dag", og fjøldin sang so inniliga við.