Heilsustýrið: Umráðandi at verja seg fyri kynsjúkum

Kynssjúkur eru ein áhaldandi avbjóðing í Føroyum. 

Tað vísa nýggj tøl fyri smittutilburðir við kynssjúkum.

Hít veitir góða verju fyri bæði klamydia og gonorre. Eingin koppseting er tøk fyri sjúkurnar, og smittan gevur tær ikki immunitet, tvs. at tú kanst verða smittað/-ur fleiri ferðir. Tí er umráðandi at verja seg.

Klamydia er vanligasta kynsjúkan

Klamydia er vanligasta kynssjúkan, men smittutølini fyri gonorre hava verið alsamt vaksandi seinastu árini.

Fyrra hálvár í ár eru skrásettir 69 tilburðir av klamydia og 8 tilburðir av gonorre. Hetta svarar til, at ávikavist 8,3 % og 1,0 % av kanningunum eru positivar. 

Hetta gevur ábendingar um, at tølini fyri 2026 kunnu gerast hægri enn í 2025, tá prosentparturin av positivum kanningum var ávikavist 6,8 % fyri klamydia og 0,6 % fyri gonorre. 
 
Flestu av skrásettu tilburðunum av klamydia eru í aldursbólkinum 20-24 ár. 

Útvið tvífalt so nógvar kvinnur sum menn eru kannaðar síðani 2024, men ein nógv størri prosentpartur av kanningunum hjá monnum eru positivar.

 
Hagtølini stava frá Rannsóknarstovuni á Landssjúkrahúsinum. Tey eru greinað í Heilsustýrinum eftir sama leisti sum Statens Serum Institut brúkar.