Telja nú "mikudagsatkvøður" í Svøríki

Í morgun komu fyrstu úrslitini frá uppteljingini av so nevndu "mikudagsatkvøðunum" - tað eru brævatkvøður og brævatkvøður úti úr heimi, sum eru komnar seint.

Hesar atkvøðurnar verða taldar upp í 314 sonevndum savningarøkjum, og fyrsta av hesum økjunum kom við fyribils úrsliti tíðliga í morgun. Valið til ríkisdagin var sunnudagin.

Sambært svenska valmyndugleikanum er talan um slakar 300.000 atkvøður tilsamans. 

Bara tríggir tingsessir eru í løtuni á muni millum politisku veingirnar - tað eru 34.000 atkvøður.

Sambært fyribilsúrslitinum hevur reyð-grøna andstøðan 176 sessir í nývalda Ríkisdegnum og Tidø-samgongan - blá-guli vongurin - hevur 173 sessir.

Óvanliga nógvar "mikudagsatkvøður"

Í ár eru fleiri "mikudagsatkvøður" enn onnur ár. Tær eru slakar 300.000 hesa ferð.

- Tað er óvanliga nógvar atkvøður, sigur Ingrid Frykmo, sum er ein teirra, ið telur atkvøður í býráðshúsinum í Stokkhólmi.

Fleiri svenskir greinarar, millum annað støddfrøðingar, hava sagt við svenska TV4 og aðrar miðlar, at atkvøðurnar, sum skulu teljast upp í dag, mugu víkja munandi frá samlaðu atkvøðunum, fyri at ávirka býtið av sessum millum reyð-grøna og blá-gula vongin. 

Men av tí at reyðgrøni meirilutin er so tepur og "mikudagsatkvøðurnar" søguliga hava ávirkað valúrslitið nógv, fylgja politikkarar og journalistar í Svøríki neyvt við uppteljingini.

Enn er ikki greitt, um uppteljingin verður liðug í dag, og valmyndugleikin hevur ávarað um, at hon ikki verður liðug fyrr enn í morgin, og tað væntar Ingrid Frykmo eisini.